Silvia e Ceci, convocadas coa Selección Española Absoluta de fútbol sala
Por Redacción
O bo papel que está a realizar o Poio Fútbol Sala no seu debut na Primeira División Feminina non pasou desapercibido para o seleccionador nacional, José Venancio, que citou á próxima concentración á porteira Silvia Aguete e á ala Cecilia Puga.
As vermellas vivirán a súa primeira cita internacional en Portugal entre os días 10 e 14 de novembro, concretamentemente desprazaranse á capital dos Azores, Angra do Heroismo, onde o combinado nacional disputará dous partidos amigables contra a selección lusa.
Esta concentración á que acoden Silvia e Ceci servirá aos técnicos para configurar a lista definitiva de xogadoras que acudan ao IV Torneo Mundial organizado en Venzuela do 11 ao 18 de decembro.
A convocatoria da Selección Española complétana: Belén, Jenni, Leti e Ana Luján (At.Madrid Navalcarnero); Chamorro (Móstoles), Lidia Mesías e Peque (Burela); Claudia (Gironella); Lucía (Viaxes Amarelle); Bea Martín (FSF Rioja); Andrea Feijóo (Alcorcón); Sara Navalón (Universidade de Alicante); e Sara Iturriaga (Citta di Montesilvano).