Cantos partidos perderase Charles? É unha das incógnitas da semana no Pontevedra Club de Fútbol, despois da expulsión sufrida nos últimos minutos do encontro que o pasado sábado enfrontou aos granates co Deportivo.

O atacante brasileiro foi expulsado con vermella directa no minuto 81 nunha disputa na que tamén puxo camiño aos vestiarios o deportivista Lara. Os presentes no estadio quedaron en moitos casos sorprendidos, ao non apreciar nada grave sobre o terreo de xogo, nin tampouco as cámaras de televisión reflectiron con claridade o acontecido.

O único seguro é que esa expulsión pode traer graves consecuencias, e ese é o temor no Pontevedra despois de comprobar a redacción da acta arbitral.

O colexiado do encontro, o canario González Francés, explicou tras o choque que tanto Charles como Lara viron o cartón vermello por "golpear no pescozo dun contrario coa man aberta usando forza excesiva, non estando o balón en xogo".

O último matiz, de non estar o balón en xogo, pode facer que a  infraccion sexa considerada como grave, o que supoñería un mínimo de dous encontros de suspensión.