Empate do Leis femenino na casa ante o Futsi; o Cidade de Pontevedra cae ante o Intersala
Por Redacción
Resísteselle a primeira vitoria ao equipo feminino do Leis Pontevedra. O Pavillón Municipal non foi talismán para as pontevedresas que tan só puideron arrancar un empate a dous goles fronte ao Futsi Atlético B.
O primeiro gol do partido chegaba no minuto 4. Tras o dominio das visitantes nos primeiros compases do encontro, Sandra marcaba o 0-1 nunha xogada de estratexia. Pero aos poucos, o Leis foise liberando e empatou dez minutos despois por medio de Lara.
A pesar de que as pontevedresas se fixeron co control do partido, as madrileñas volveron adiantarse no marcador por medio de Flavia. Co 1-2 o partido íase ao descanso.
Na segunda parte, as locais foron as dominadoras do partido e centráronse no ataque sobre a portería visitante. O empate chegaría no minuto 29. Unha boa xogada colectiva sacando o balón de atrás e rompendo a presión do Futsi, deixou a Patri soa ante a meta madrileña á que superou sen problemas.
A pesar de ter varias oportunidades máis, entre elas un dobre penalti que non acertou a meter Lucía, o Leis non puido darlle a volta ao marcador e quedar con tres puntos máis que merecidos.
Con este empate, o Leis continúa como pechacancelas do grupo 4 da Segunda División con tres puntos.
DERROTA DO CIDADE DE PONTEVEDRA
Tampouco lle foron moi ben as cousas ao outro equipo pontevedrés da categoría. O Cidade de Pontevedra caeu en casa por 4-6 ante o Intersala.
Tras esta derrota, as de Jacobo Estors son oitavas no grupo 1 da Segunda División. Teñen oito puntos.