O Torneo Internacional Junior ITF de Sanxenxo achégase ás súas roldas finais
Por Redacción
Igualdade máxima e tenis de moitos quilates o que se está vendo esta semana nas pistas do Círculo Cultural Deportivo de Sanxenxo.
O XV Torneo Internacional Junior ITF avanza cara ás súas roldas finais e faino xa sen xogadores galegos nos seus cadro principais.
A arousá Jessica Bouzas, de só 14 anos, foi a última en caer eliminada, no seu caso no torneo de dobres, ao perder xunto á súa compañeira Laura López ante as francesas Loudmilla Bencheikh e Mylene Halemai (6-3 e 6-4).
Na competición individual, este mércores despediuse do torneo o primeiro favorito masculino e número 63 do ránking mundial sub-18, o checo Michael Vrbensky, ao perder ante o búlgaro Adrian Andreev (7-5, 1-6 e 6-4).
Pola súa banda no cadro feminino a máxima favorita, a húngara Panna Udvardy, continúa adiante pero tras sufrir ante a portuguesa Francisca Jorge (3-6, 6-3 e 6-4).
O Torneo de Sanxenxo encara agora as súas últimas e defenitivas roldas ata as finais previstas para o vindeiro domingo 23.