O Concello, primeiro organismo que apoia a campaña do Teucro para recadar fondos
Por Redacción
A Sociedad Deportiva Teucro iniciou a busca de apoios para a campaña de microfinanciamento "(Es un 10) Contigo, sempre Teucro", coa que aspira a conseguir ao redor de 40.000 euros, necesarios para afrontar os pagamentos pendentes ata final de tempada.
O primeiro deses apoios encontrárono os azuis no Concello de Pontevedra, dentro da rolda de contacto con institucións, empresas e asociacións que este mércores iniciou a directiva da entidade.
Miguel Anxo Fernández Lores e Agustín Fernández, alcalde e concelleiro de Deportes, anunciaron a súa participación na iniciativa, facéndoa extensiva ás máis de 400 persoas que compoñen o plantel municipal. Neste sentido, os empregados recibirán un vale informativo que poderán cambiar nos despachos do Municipal por unha das entradas conmemorativas da campaña polo prezo de 10 euros, pasando ademais a formar parte co seu nome da camiseta especial que se preparará para o último partido de liga.
O presidente do Teucro, Carlos García-Alén, trasladou aos representantes municipais o que se quere buscar coa campaña, "pretendemos sentir o alento da cidade e o apoio social nun momento económico moi difícil no que o equipo está necesitado de toda a axuda que poida lograr".