Changui sentencia no desconto a permanencia do Ribadumia (1-0) ao impoñerse ao Negreira
Por Redacción
Tarde de transistores e nervios na Senra. Ribadumia e Negreira necesitaban gañar para asegurar matematicamente a permanencia sen estar pendentes do que sucedese noutros campos. Ambos conseguiron o seu obxectivo. Os de Sierra grazas a un gol de Changui no desconto, e o cadro visitante, a pesar da derrota, mercé aos resultados de terceiros que tamén lle deixan a salvo de calquera complicación na última xornada.
Os locais tiñan ante si a súa materia pendente: volver gañar ante os seus, xa que non o facían no seu campo desde o 24 de xaneiro, cando se impuxeron a As Pontes pola mínima. Iso fixo que a responsabilidade pesase en exceso ante un Negreira tamén condicionado pola súa frouxa liña de resultados nas once últimas xornadas, nas que só conseguira dúas vitorias.
Todo iso traduciuse nun partido trabado, sen demasiadas ocasións e no que as mellores noticias para ambos chegaban desde O Barco e Carballo, onde nin Galicia Mugardos nin Órdenes conseguían vencer, o que significaba que para a permanencia matemática bastaba tamén o empate.
Aínda así, os minutos de desconto, tantas veces protagonistas negativos na actual tempada, volveron selo nesta ocasión, cando un envío en profundidade que buscaba a Hugo, terminou co dianteiro local chocando na disputa contra un defensa e porteiro visitantes. O balón quedou solto na área para que Changui, unha vez máis (minuto 91), fixese gala de oficio, enviando ao fondo da portería.
Consulta aquí o acta do partido.