O Leis vence ao Cuéllar nun bo partido e o ADFS Bueu cae en Valladolid
Por Redacción
O Leis Pontevedra protagonizou no Municipal un dos mellores partidos da tempada para impoñerse a un dos aspirantes ao título ligueiro na Segunda B, o Cuéllar-Cojalba (4-1).
Os pontevedreses expuxeron desde o inicio unha presión alta que afogou aos visitantes. Así, cun roubo chegou o 1-0 obra de Raúl no minuto 7, repetindo o capitán tres minutos despois co seu segundo tanto.
Con ese resultado chegábase ao descanso, e a tónica mantívose no segundo acto con presión, intensidade e o Cuéllar sen chegar claramente a porta.
Os minutos foron pasando sen que os de Manu Cossío pechasen o partido, ata que faltando seis minutos os visitantes apostaron por xogar de cinco na busca da remontada. O que chegou con todo foi o 3-0 nun roubo, o terceiro gol de Raúl. Na seguinte xogada o Cuéllar recortou distancias, pero Dani encargouse de sentenciar nos instantes finais.
Con este resultado o Leis segue sexto con 43 puntos, pero mantense na pelexa pola cuarta praza.
O que segue sen gañar é o ADFS Bueu, que realizou un bo partido na cancha do Universidad de Valladolid, colíder da competición, pero do mesmo xeito que noutros encontros terminou cedendo na segunda metade vítima dunha baixada de rendemento físico (6-3).
Os do Morrazo son pechacancelas da liga con 14 puntos.
EMPATE DO LEIS MARCÓN EN MADRID
Na Segunda División Feminina o Leis Marcón sumou un punto na cancha dun rival directo, o Futsi Atlético (1-1), nun partido no que dominaron o xogo pero no que fallaron na definición ante a meta rival.
Tras chegar con empate sen goles ao descanso o Futsi adiantouse aos 30 minutos, pero o Leis reaccionou no 37 coa igualada, obra de Anita. Con este empate as pontevedresas quedan na décima praza con 20 puntos.