O Campionato do Mundo de Salvamento, no punto de mira de Cristina García
Por Redacción
Cristina García, con catro medallas, foi unha das deportistas máis destacadas do Campionato de España de Salvamento Absoluto, Junior e Xuvenil celebrado a pasada fin de semana en Torrevieja (Alacante).
A deportista do PC Salvamento Sanxenxo conseguiu dúas medallas de ouro, en 200 metros Supersocorrista e os 50 metros Arrastre de maniquí, e outras dúas de bronce en 100 metros Combinada e 100 metros Socorrista, uns resultados que lle colocan entre as favoritas para formar parte do equipo nacional no próximo Campionato do Mundo de Salvamento, principal obxectivo da tempada, que se celebrará do 1 ao 18 de setembro en Holanda.
Despois de tres participacións coa selección nacional nos World Games de Colombia, Europeo de Holanda en 2013 e Mundial de Francia en 2014, Cristina quedou sen praza no equipo español o pasado ano. Agora, con Pablo Expósito como o seu novo adestrador e cun renovado plan de traballo a deportista do PC Salvamento Sanxenxo ponse metas ambiciosas. "El trabajo ya está bien hecho y ahora sólo queda competir", sinalou tras o Campionato de España.
Antes de conformarse o equipo para o Mundial restan dúas competicións de gran importancia, como son o IV Open internacional de Salvamento en Madrid no mes de maio e o Campionato de España Absoluto de Verán de Salvamento que terá lugar en Alacante en xullo.
No Nacional de Torrevieja competiron ademais outros dous deportistas do Sanxenxo, Martín Paz na categoría junior e Anxo Martínez na absoluta.