Punto de garra para o Teucro ante o Go Fit Sinfín (30-30)
Por Diego Espiño & Diego Torrado
O Teucro sumou un punto de ouro ante un rival directo pola permanencia como o Go Fit Sinfín (30-30) nun partido no que se sobrepuxeron ás adversidades para chegar con vida aos últimos instantes.
Os azuis notaron a ausencia do seu gardameta Ricardo Amérigo e a curta rotación, pero botaron o resto para levantar un partido que na primeira metade púxose moi en contra, cunha renda de cinco tantos para o cadro santanderino.
Pablo Paredes (12 goles en todo o choque) era un auténtico pesadelo para a defensa pontevedresa desde o lateral esquerdo. Grazas á súa efectividade o Go Fit disparouse de saída a un 5-10 que obrigou a pedir tempo morto a Quique Domínguez.
Tentaron reaccionar os teucristas, pero o equipo cántabro mantiña o ton en ataque. Só facía falta que aparecese timidamente Andrés Delgado en portería para cun par de intervencións contaxiar aos seus compañeiros, que en ataque empezaron a atopar porta con facilidade da man dun sobresaliente Erik Balenciaga e en defensa subiron a intensidade.
Grazas a iso os azuis superaron mesmo dúas inferioridades, que saldaron ao seu favor, e voletaron o electrónico poñéndose por primeira vez en vantaxe (15-14, min 25). Empezaba entón un novo partido, caracterizado pola igualdade e as alternativas, que se mantería ata os tensos minutos finais.
Tras chegar empatados ao descanso, ningún dos dous equipos foi quen de marcar diferenzas. Puido facelo o Teucro con dúas superioridades numéricas, pero non aproveitou as ocasións ao definir mal as súas opcións no que é un dos puntos fracos do equipo esta tempada, o xogo cun home máis en cancha.
Así se chegou ao últimos cinco minutos, que arrincaron coa terceira exclusión do ex-teucrista Calderón iniciando unha serie de accións polémicas que terminarían con rifa final sobre a cancha.
Na única superioridade que aproveitaron os de Quique Domínguez Balenciaga puxo en vantaxe ao Teucro (29-28), pero Víctor tamén vía a descalificante pola súa terceira exclusión igualando de novo a balanza.
Aguantou en inferioridade o Teucro, e cun xogador menos tivo dúas opcións de ataque para adiantarse, pero non o conseguiu. Faltaba un minuto e Paredes empeñábase en seguir amargando a noite aos azuis. Puxo en vantaxe ao Go Fit con apenas 30 segundos por xogar, pero unha rápida transición teucrosta acabou cun sete metros que Carlos García non desaproveitou para poñer o 30-30 final.
Quedaba aínda tempo para unha acción, que se saldou cunha vermella directa moi discutida a Carró e o fallo en ataque dos cántabros, antes do penoso espectáculo dos protagonistas rifando tras o bocinazo final.
A pesar diso, o punto sabe a moito a un equipo pontevedrés que afronta agora a fase máis decisiva da competición na súa loita por tentar salvar a categoría.
SD TEUCRO (30): Andrés Delgado, Víctor Rodríguez, Carró (1), Carlos García (9, 6p), Rial (4), Dani Hernández (6, 3p), Samu Gómez (1) -sete inicial- Balenciaga (7), Iván Fernández, Edu Moledo (2), Pichel, Román Pedreira.
GO FIT SINFÍN (30): Ernesto Sánchez, Postigo (1), Alejandro Álvarez (4, 1p), Paredes (12), Herrero (4), Ros (1), Iñigo (1) -sete inicial- Diego Muñiz, Canedo (1), Saúl Campo (2), Óscar Río, Calderón (1), Blázquez (1), Merino (2), Savic, Alberto Pla.
Árbitros: Carlos Javier e Juan José Gude Prego (País Vasco). Excluíron a Víctor Rodríguez (3), Dani Hernández e Carlos García no Teucro e a Calderón (3) e Saúl Campo no Sinfín. Descalificaron por vermello directo a Gonzaló Carró nos locais.
Marcador cada cinco minutos: 3-4, 5-9, 7-11, 11-13, 15-14, 17-17, descanso, 20-20, 22-22, 25-25, 26-27, 28-28, 30-30.
Incidencias: Partido da Liga Asobal disputado no Pavillón Municipal dos Deportes de Pontevedra ante 1.014 espectadores. Gardouse un minuto de silencio polo falecemento do pai do xogador do Teucro Ricardo Amérigo.
Relacionadas:
-
Cidade Encantada e Teucro reparten puntos nun partido de infarto (28-28)
Por Redacción |
-
O Teucro, a poñer fin ao seu mal fario fóra da casa ante un Ciudad Encantada "enrabietado"
Por Diego Espiño |
-
Un partido que vale máis de dous puntos
Por Diego Espiño |
-
Amérigo, baixa inesperada dun Teucro "mentalizado" ante o importante partido contra o Go Fit Sinfín
Por Diego Espiño |
-
Momento decisivo para o Teucro na súa loita pola permanencia
Por Diego Espiño |
-
Dez malos minutos lastran ao Teucro en Guadalajara (32-30)
Por Redacción |