Maratón de fútbol sala de base coa terceira edición do Torneo de Reis
Por Redacción
Na súa terceira edición, o Torneo de Reis do Leis Pontevedra segue crecendo coa intención de que "año tras año se vaya promocionando y cada vez venga más gente", explicou na súa presentación Sergio García.
Nesta ocasión serán dous días de intenso fútbol sala, o sábado 2 e o domingo 3 de xaneiro, nos pavillóns Municipal, Multiusos e Xunqueira II.
En total tomarán parte 400 xogadores nas seis categorías, desde a prebenxamín ata a xuvenil.
Durante o sábado, en horario continuado de 9:00 a 21:00 horas disputaranse as correspondentes fases de grupos, mentres o domingo 3 será quenda para as semifinais e finais das diferentes categorías.
Burela, Noia, Redondela, Vigo 2015, Beade, Verín ou Hércules da Coruña atópanse entre os clubs invitados para a terceira edición do evento.
O torneo foi presentado este martes no Concello de Pontevedra, onde se explicou tamén o proxecto polo que o Leis presentou un calendario de desexos, co que espera potenciar en 2016 aspectos como a igualdade de xénero, a inclusión social ou a alimentación saudable, entre outros.