Un millonario 'convida' a Gómez Noya a participar nun exclusivo tríatlon na súa casa de Bahamas
Por Diego Espiño
Javier Gómez Noya disponse a pechar unha exitosa tempada deportiva, a do seu quinto título das Series Mundiais, dunha maneira diferente e exclusiva.
Farao participando en Bahamas na primeira edición do Island House Invitational Triathlon, un evento no que só participan, previa rigorosa invitación, dez triatletas en categoría masculina e dez na feminina, todos eles grandes campións en diferentes modalidades do seu deporte.
Trátase dunha competición de tres días creada polo multimillonario Mark Holowesko e que se vende como un dos tríatlons con maiores premios en metálico do planeta.
Para maior xúbilo do magnate, o Island House Invitational partirá dun dos seus hoteis na illa privada de Highbourne Cay, Exuma (Bahamas).
Serán tres días de tríatlon con diferentes probas, a disputar entre o vindeiro venres día 6 e o domingo 8 de novembro.
O primeiro día, prólogo, os participantes afrontarán 500 metros de natación, 8 quilómetros de ciclismo e 2 quilómetros de carreira a pé. O segundo será quenda para o Olympic Enduro cun circuíto de 500 metros de natación, 13 quilómetros de ciclismo e 3,3 quilómetros de carreira que deberán completar tres veces, mentres a proba final disputarase en distancia sprint (750 metros a nado, 20 quilómetros en bicicleta e 5 quilómetros a pé) coa particularidade de non poder facer drafting (ir a roda no sector de ciclismo).
Un novo reto para Gómez Noya, que recoñeceu a través da súa conta de Twitter que para el é "unha honra ser elixido para competir nun evento moi especial".
Salimos para Bahamas para competir en el @IslandHouseTri Un honor haber sido elegido para competir en un evento muy especial...
— Javi Gomez Noya (@Jgomeznoya) noviembre 3, 2015
Ademais de Gómez Noya, participará en categoría masculina un dos seus rivais habituais en distancia olímpica como é o surafricano Richard Murray ou campións en distancia Ironman e 70.3 como Ben Hoffman ou Tim O'Donnell. Completan a nómina de deportistas Barrett Brandon, Tim Don, Cam Dye, Leon Griffin, Luke McKenzie e Trevor Wurtele.
En categoría feminina as triatletas convidadas son: Lauren Brandon, Mirinda Carfrae, Leanda Cave, Flora Duffy, Gwen Jorgensen, Rachel Joyce, Alicia Kaye, Rachel Klamer, Lisa Norden e Heather Wurtele.
Relacionadas:
-
Gómez Noya, distinguido como mellor deportista do ano polo Comité Olímpico Español
Por Redacción |
-
As Bahamas réndense a un maxistral Gómez Noya, que pon o broche de ouro a unha sensacional tempada
Por Alejandro Espiño |
-
Impulsan unha petición popular para que Javi Gómez Noya reciba o Premio Princesa de Asturias
Por Diego Espiño |
-
Javi Gómez Noya recibe, unha vez máis, o agarimo dos pontevedreses
Por Diego Espiño |
-
Gómez Noya, recibido con honras en Peinador
Por Diego Espiño & Mónica Patxot |
-
Pentacampión! Javi Gómez Noya engrandece a súa lenda co seu quinto título das Series Mundiais
Por Alejandro Espiño |