120 corredores celebran os 30 anos da carreira popular de Pintos
Por Redacción
Trinta anos van xa dende que os veciños do lugar de Pintos, na parroquia de Marcón, empezaron a celebrar a súa carreira popular. Pasadas estas tres décadas, a cita deportiva xa está consolidada e este sábado xuntou máis de 120 corredores en oito categorías diferentes.
A carreira está pensada para nenos e adultos de todas as idades, se ben maiores e pequenos teñen percorridos distintos e hai categorías diferenciadas por idades e por xénero. Nas categorías intermedias, como xa é habitual, participaron corredores chegados dende toda a parroquia de Marcón e tamén atletas máis experimentados de diversos puntos da provincia.
Os primeiros clasificados de cada categoría recibiron trofeos e medallas e, xusto ao remato da carreira, corredores e público asistente participaron nun sorteo de regalos como xamóns, aparellos electrónicos e outro tipo de regalso doados polos organizadores. Previamente, vendéranse rifas.
Neste 30 aniversario da carreira a organización decidiu repetir a iniciativa que puxeron en marcha en 2014 de solidarizarse coas entidades integradas na iniciativa municipal RedeAxuda. Público e corredores doaron varios quilos de alimentos que serán entregados á plataforma para o seu reparto entre as asociacións e personas máis desfavorecidas de Pontevedra.
Ademais, con motivo destes 30 anos de carreira, ás 22.30 horas deste sábado hai prevista unha festa-serán na que participarán diversos grupos de gaitas e pandereteiras e que rematará cunha foliada aberta. Para complementar a festa, a organización instalou unha carpa na que se venderán bebidas e pinchos a prezos populares e que incluirá un novo sorteo de premios.