Os penaltis viran as costas ao Villalonga na final da Copa Deputación, que se leva o Choco
Por Redacción
O Club Deportivo Choco é o novo campión da Copa Deputación de fútbol, despois de impoñerse na final e por penaltis ao Villalonga.
Os 90 minutos de xogo caracterizáronse pola tensión e emoción propia dunha final. Malia os nervios o Villalonga arrancou mellor, con dous ocasines de gol nos primeiros minutos, pero o Choco adiantouse na súa primeira chegada ao aproveitar Fernando un pase de Hugo.
Era o minuto 7, pero os celestes reaccionaron para poñer as táboas no 21 por medio de Saúl.
Poñíalle máis ganas o cadro de San Pedro, aínda que a efectividade era maior nos de Redondela, que se foron ao descanso con vantaxe ao acertar Silva na definición ante Berto.
Na reanudación o Villalonga buscou de novo o empate e encontrouno nunha xogada afortunada, na que Carminatti rematou cara á súa propia portaría.
Faltaba media hora de xogo, e malia un disparo ao longueiro do Choco o marcador xa non se moveu, deixando a resolución do título para a quenda de penaltis, na que os redondelanos estiveron máis acertados para levarse a Copa Deputación aproveitando un único erro no lanzamento, o de Machu.
VILLALONGA FC (2): Berto, Darío, Adrián Santos, Alberto Rey, Fran Campos (Arias, min.78), Manu, Jesu (Chiño, min.56), Rubén Cerqueiras (Ramón, min.72), Alberto Villar (Héctor, min.80), Machu, Saúl.
CD CHOCO (2): Aarón, Yago Vázquez, Saúl (Míchel, min.46), Criss, Carminatti, Fernando, Comis, Xosé (Pablo Piñeiro, min.56), Róber (Gonza, min.63), Hugo, Silva (Molinos, min.69).
Arbitro: Gondar Martínez (Pontevedra), auxiliado por Balboa Torres e Campo Rosales. Amoestou a Fran Campos, Manu, Cerqueiras e Arias no Villalonga e a Saúl, Carminatti, Comis, Hugo e Silva no Choco.
Goles: 0-1 Fernando (min. 7); 1-1 Saúl (min. 21); 1-2 Silva (min. 40); 2-2 Carminatti, en propia meta (min. 60).
Incidencias: Partido disputado no campo de Baltar, Portonovo.