Pedro Merino aguanta a presión e adxudícase a XIV Volta a Coruña
Por Redacción
O gran traballo de control do Grupo Deportivo Supermercados Froiz deulle a Pedro Merino o triunfo final na XIV Volta Ciclista á Provincia da Coruña.
Merino, que conseguiu o liderado na primeira etapa en Monfero, defendeu con solvencia a súa posición de privilexio nas dúas últimas xornadas.
Na segunda etapa a carreira chegou ao sprint, co ciclista do Froiz no grupo, mentres na terceira e última en Valdoviño Merino tivo que sufrir para conseguir o triunfo final.
Tras unha dura loita a etapa foi para Pablo Guerrero (Extremadura) con sete segundos de vantaxe sobre un pequeno grupo no que se encontraban os favoritos.
Merino fixo valer a vitoria na primeira etapa, pois rematou na xeral co mesmo tempo que Fernando Barceló (Fundación Contador), mentres Hurria Segurola (Fundación Euskadi) completou o podio coa terceira praza.