Martín Lestido e Roberto Mediero, subcampións galegos de ciclismo elite e sub-23
Por Redacción
Dobre éxito do Super Froiz no campionato galego de ciclismo elite e sub-23 que se disputou este domingo entre Camariñas e o alto do miradoiro de Ézaro (Dumbría). Un percorrido de 118 quilómetros nos que se impuxo Aser Estévez, corredor do Rías Baixas. Gañou ao sprint a Martín Lestido, ciclista do equipo pontevedrés. O seu compañeiro Roberto Mediero, cuarto en liña de meta, colgou a medalla de prata na categoría sub-23.
O perfil da proba facía presaxiar que o ascenso ao miradoiro de Ézaro marcaría o desenlace da proba. Non obstante, o paso do alto de Paxareiras a 35 quilómetros de meta foi decisivo para romper a carreira. Pouco antes do ascenso saltaron Jacobo Ucha (Caja Rural), Raúl Fernández (Froiz) e Samuel Rodríguez (Rías Baixas), que chegaron a contar cunha vantaxe de dous minutos sobre un pelotón controlado polos pontevedreses.
A eles sumouse o coruñés Dani López (Caixa Rural), gañador sub-23 o pasado ano, no cume de Paxareiras. O descenso do porto, rápido e técnico, aproveitouno Jacobo Ucha para sorprender os seus compañeiros de escapada e tratar de facer boa unha fuga afastada. A aventura do corredor de Caja Rural chegou a contar con máis dun minuto de vantaxe, pero reduciuse a 45 segundos aos pés de Ézaro.
Pero estes dous últimos quilómetros de carreira, a temida suba ao miradoiro sobre o río Xallas, foron eternos para el e con dous equipos tirando para favorecer aos seus líderes o Froiz e o Rías Baixas, pronto neutralizaron esta escapada. Martín Lestido e os ciclistas do Rías Baixas Aser Estévez e Álex Santos, superaron a Ucha na zona coñecida como o muro de formigón do Ézaro, dúas curvas cun 28% de desnivel.
O trío de cabeza disputou un sprint no que triunfou Estévez sobre o corredor do Froiz. Terceiro foi Álex Santos, que se proclamou campión galego sub-23. A 55 segundos deles entrou Roberto Mediero, cuarto na xeral, e que subiu ao podio como segundo clasificado na categoría sub-23. Antonio Portela, José Luis Mariño e Raúl Fernández, os tres entre os dez primeiros, completaron a grande actuación do Super Froiz nestes campionatos.