Gómez Noya triunfa en Yokohama tras impoñerse a Alistair Brownlee nun emocionante sprint
Por Diego Espiño
Recordou ao sucedido en Londres 2013, onde Javier Gómez Noya logrou o seu terceiro campionato mundial, pero esta vez non estaba en fronte Jonathan Brownlee, senón o seu irmán Alistair.
O triatleta galego rematou unha gran carreira en Yokohama (Xapón) impoñéndose ao británico nun emocionante sprint final para lograr o seu primeiro triunfo da tempada nas Series Mundiais.
Gómez Noya, como de costume, posicionouse no grupo de cabeza tras 1.500 metros de natación iniciais, pero pronto o pelotón perseguidor encabezado entre outros por Mario Mola neutralizou a renda para agrupar a carreira no inicio do ciclismo.
Os 40 quilómetros en bicicleta transcorreron sen sobresaltos, ata que se legou á última transición e comezaron os 10 quilómetros finais de carreira a pé.
O triatleta afincado en Pontevedra saíu con forza da transición e pronto seleccionou un grupo na cabeza de cinco, con Brownlee, Mola, Vicente Hernández e Riederer.
Un ataque do británico, seguido dunha réplica do galego, fixo que o grupo se reducise primeiro a tres compoñentes e despois a só dous ao descolgarse o mallorquino Mola xa nos últimos quilómetros.
Brownlee intentou entón repetir o de Cidade do Cabo, cando arrancou nos ultimos metros para conseguir o triunfo, pero esta vez Gómez Noya non estaba polo labor de ceder e aguantou o tipo para xogárseo todo nun brillante sprint final e entrar primeiro en meta cun tempo de 1:47:00.
A dous segundos entrou Brownlee e a 20 Mario Mola para completar o podio, mentres Fernando Alarza entrou na oitava praza.
A vitoria en Xapón consolida ademais no liderado das Series Mundiais a Javier Gómez Noya cando se chega ao ecuador do campionato, comandando a clasificación xeral con 3.507 puntos polos 2.958 de Mola e os 2.685 de Alarza.
A próxima proba do mundial celebrarase en Londres o próximo 31 de maio.
Relacionadas:
-
Javier Gómez Noya renuncia a competir nas Series Mundiais de Londres
Por Redacción |
-
Liderado das Series Mundiais para Gómez Noya tras ser segundo Sudáfrica con gran debut de Pablo Dapena
Por Diego Espiño |
-
Terceiro posto para Javi Gómez Noya nas Series Mundiais de Gold Coast tras unha complicada carreira
Por Diego Espiño |