Adiantar o pagamento aos clubs, obxectivo do IMD na convocatoria de axudas ao deporte federado
Por Redacción
A Xunta Reitora do Instituto Municipal de Deportes celebrada este mércores aprobou as bases da convocatoria de axudas destinadas aos deportes federados na cidade durante 2015.
Fíxoo co obxectivo de axilizar os trámites necesarios antes de recibir as cantidades pactadas, algo que se espera suceda en outubro para poder convocar nese mesmo momento as subvencións de 2016.
O IMD espera adiantar aínda máis os tempos en 2016 para lograr pagar as axudas a principio de ano.
O presuposto desta liña de axudas, destinada á práctica deportiva, participación en competicións oficiais e realización de actividades deportivas de interese social, increméntase en 2015 dende os 291.000 euros ata os 300.000.
Os clubs interesados en solicitar a subvención terán 15 días de prazo unha vez saia publicado o anuncio pertinente no Boletín Oficial da Provincia.
Tras asinar hai uns días a liña de axudas para a organización de eventos, a concellaría de Deportes debe aínda tramitar a terceira vía de subvención aos clubs deportivos da cidade, a correspondente á actividades das Escolas Deportivas cun presuposto de 119.500 euros.