Echegoyen e Betanzos caen á cuarta praza pero manteñen as súas opcións no Trofeo Princesa Sofía
Por Redacción
Tras un brillante inicio de competición, con tres triunfos parciais e un oitavo posto que as mantiña no liderado, Támara Echegoyen e Berta Betanzos caeron ao cuarto posto da clasificación do Trofeo Princesa Sofía de vela que se está a disputar na Bahía de Palma.
A regatista pontevedresa e a súa compañeira en 49 er FX non se mostraron tan acertadas no terceiro día de competición, no que sumaron un cuarto, un vixésimo e un vixésimo primeiro posto nas tres mangas disputadas correspondentes xa ás series finais.
Echegoyen e Betanzos descartaron o resultado da última manga, pero aínda así caen dende o primeiro ao cuarto posto dunha xeral que pasa a estar dominada polas danesas Jena Mai Hansen e Katja Salskov-Iversen seguidas das súas compatriotas Maiken e Anne-Julie Fogh e as holandesas Anneniek Bekkering e Annette Duetz.
Malia esta caída o tándem galego-cántabro mantén intactas as súas opcións de participar na Medal Race.
Pola súa banda os irmáns vilagarciáns Carlos e Antón Paz sitúanse na vixésimo quinta praza do 49er tras encadear unha non comparecencia (descarte), un vixésimo terceiro e un vixésimo primeiro posto na xornada do mércores.