Bos resultados da Sociedad Gimnástica no Campionato de España de Maratón
Por Redacción
Era moi complicado que, ante os rivais aos que se enfrontaban, os atletas da Sociedad Gimnástica lograsen algunha medalla no Campionato de España de Maratón, disputado esta fin de semana en San Sebastián. Pero aínda así conseguiron unha brillante clasificación.
Robertas Geralavicius non podía optar a medalla por ter nacionalidade lituana, pero na súa segunda aventura no maratón mellorou a súa marca persoal. Finalizou en quinta posición cunha marca de 2:20:32, quedando a tan só 22 segundos do terceiro posto.
Fixo unha carreira na que foi de menos a máis. Dende o principio foi ao seu ritmo e deixou que marchase o grupo de cabeza, pero a partir da metade da proba foi progresando na clasificación e case logra engancharse aos atletas que entraron en meta nos primeiros postos.
Rubén Diz tamén asinou unha fantástica actuación conseguindo o duodécimo posto, ao concluír a proba cun tempo de 2:28:35. Foi o quinto clasificado a súa categoría veterana de maiores de 35 anos.
Fixo unha carreira moi intelixente, pero ao final pasoulle factura o temido muro dos 35 quilómetros, cando lle empezaron a fallar as forzas. Pero non foi o único que se viu obrigado a baixar o ritmo de carreira e practicamente non perdeu posicións nos quilómetros finais.