O Pontevedra B segue sen levantar cabeza e cae derrotado (1-2) ante o Lalín na Xunqueira
Por Redacción
Difícil será que o Pontevedra B poida reaccionar desaproveitando oportunidades con partidos como o deste domingo na Xunqueira. Ben é certo que o rival tampouco era o propicio para corrixir o rumbo. Visitábaos o Lalín, un equipo en plena loita polo ascenso de categoría. E aínda que as diferenzas non se notaron en exceso os do Deza levaron os tres puntos tras derrotar os pontevedreses por 1-2 e mantéñense en segunda posición.
As numerosas baixas coas que afrontaron o encontro lastraron o rendemento do equipo de Blas Charlín, que non puido sentarse no banco tras a súa expulsión do pasado domingo. Na primeira parte, o Lalín fíxose dono do centro do campo e iso permitiulle controlar o partido con comodidade.
A iso contribuíu ademais encontrarse co 0-1 aos oito minutos. Marcos centrou dende a banda esquerda e ninguén acertou a despexar o balón. E minutos antes do descanso, Dani marcaba o segundo tras un forte disparo cruzado.
A segunda parte foi bastante diferente. A iniciativa foi para o Pontevedra B, cuxos xogadores parecían decididos a reaccionar. E fixérono ao pouco tempo de terse continuado o xogo. Un balón chegaba a Agus e este dende o bordo da área superaba o porteiro lalinense. Era o minuto 50 e aínda quedaba moito partido por diante.
O filial pontevedrés intentouno ata a extenuación, de todas as formas posibles. E a punto estivo de marcar o empate, grazas primeiro a Marou que non acertou finalmente co disparo e despois a David cuxo remate de cabeza se foi fóra tras pegar no longueiro.
Tras esta derrota, o Pontevedra B segue na última praza da categoría. Ten só cinco puntos e está xa a oito da salvación.
PONTEVEDRA CF B (1): Álvaro, Yago, Marou, Dani Adán, Corrales, Emilio (Miranda, minuto 74), Manu, Agus, Mario (David, minuto 68) e Diego Lorenzo (Andrés, minuto 46).
CD LALÍN (2): Miguel, Granja, Vidal, Rucho, Lamas, Imanol, Matías, Íker Hurtado (Álex Rivas, minuto 70), Dani Méndez (Louzao, minuto 88), Gustavo e Toño.
Árbitro: Rivera Gores, auxiliado nas bandas por Veloso Prado e Sánchez Tierra. Amoestou a Dani Adán polos locais e a Rucho e o seu adestrador polos visitantes.
Goles: (0-1) Vidal, minuto 8. (0-2) Dani Méndez, minuto 43. (1-2) Agus, minuto 50.
Incidencias: Partido disputado no campo da Xunqueira, Pontevedra. O Pontevedra B non presentou adestrador pola expulsión de Blas Charlín a semana pasada.