Támara Echegoyen e os irmáns Paz, a polas medallas na final da Copa do Mundo de vela
Por Redacción
A vela pontevedresa está rendendo a un nivel extraordinario na final da Copa do Mundo que se está a disputar en augas de Abu Dhabi (Emiratos Árabes). As dúas embarcacións con representación galega clasificáronse para a loita polas medallas, regata que se celebrará este domingo. Tanto Támara Echegoyen coma os irmáns Paz afrontarán esta última xornada con opcións de colgarse algún metal.
Tres novas probas disputaron este sábado Támara Echegoyen e a súa compañeira, a cántabra Berta Betanzos, na clase 49er FX. Un décimo quinto, un terceiro e unha impecable vitoria parcial na terceira e última regata da xornada permitíronlles achegarse ao podio, do que os separan tan só cinco puntos. Foilles mellor que o venres, onde anotaron anotábase un cuarto, un décimo quinto que pasou a ser o seu descarte e un noveno posto.
Con estes resultados, ambas as dúas botaranse á auga na Medal Race coa mirada posta no podio. As neozelandesas Alexandra Maloney e Molly Meech teñen todo a favor para converterse en campioas da última proba da ISAF ao avantaxar en 15 puntos as segundas clasificadas, as suecas Lisa Ericson e Hanna Klinga. O terceiro posto provisional ocúpano as italianas Giulia Conti e Francesca Clapcich.
Pola súa parte, Antón e Carlos Paz tamén lograron unha vitoria parcial este sábado. Dende que comezou a competición foron de menos a máis na clase 49er. Se a primeira xornada a remataban undécimos, as tres regatas do venres permitíanlles erguerse á sétima posición e situarse a tan só seis puntos do podio, tras lograr un oitavo, un cuarto e un sexto posto, respectivamente.
Pero este sábado, os vilagarcianos dérono todo e, ademais de lograr a vitoria na última regata do día, asinaron un sétimo e un oitavo posto. Estes bos resultados, sitúaron os irmáns á terceira praza provisional, polo que afrontarán a Medal Race do domingo en postos de medalla. Están empatados a puntos cos franceses Julien d'Ortoli e Noé Delpech, e a sete e dous puntos respectivamente do primeiro e segundo posto.