Dobre triunfo en Lugo para os equipos do Club Voleibol Pontevedra
Por Redacción
Positivo desprazamento para o Club Voleibol Pontevedra na súa visita á cancha do Emevé de Lugo no segundo compromiso ligueiro para os seus equipos sénior.
O conxunto masculino impúxose por un set a tres logrando o seu primeiro triunfo do curso sobrepoñéndose ás baixas coas que chegou ao partido, que foi máis igualado do que reflicte o marcador final.
Pola súa banda as rapazas calcaron este resultado, un set a tres, despois de impoñerse no primeiro set, ceder no segundo e resolver nos dous seguintes parciais.
O bloque feminino, que se coloca segundo na xeral con seis puntos, recibirá o próximo fin de semana ao Calasancias Coruña, mentres aos rapaces lles toca xornada de descanso.