Éxito de participación no XXXV Maratón San Antón de Cuntis
Por Redacción
Un total de 732 atletas tomaron a saída este domingo no tradicional Maratón San Antón de Cuntis, que chegou á súa trixésimo quinta edición.
Os deportistas, distribuídos en 14 categorías en función da súa idade, encheron de cor o centro da vila termal nunha proba que para os deportistas sénior transcorría nun circuíto de 10.000 metros atravesando o centro urbano.
En categoría masculina Elías Domínguez fíxose co triunfo cun tempo de 34 minutos e 2 segundos, mentres en féminas a vencedora absoluta foi a estradense Isabel Sáez completando o percorrido en 44 minutos e 56 segundos.
O Maratón San Antón, organizado polo Club Atletismo Cuntis co apoio do Concello e o Balneario, trata de "fomentar o deporte entre os veciños ademais de atraer a numerosos visitantes á vila termal", segundo sinalou Alfonso Iglesias, representante da organización.