350 ximnastas disputarán o Campionato de España de Trampolín a partir do xoves 26 no Pavillón
Por Redacción
Pontevedra será o centro de atención dos ximnastas españois a partir do xoves 26 e ata o 29 de xuño con motivo da organización do Campionato de España de Ximnasia en Trampolín que se celebrará no Pavillón dos Deportes. Durante catro días, 350 ximnastas procedentes de 12 Comunidades Autonómas, un 15% máis que na edición de 2013 disputada en Valladolid. O incremento prodúcese, sobre todo, entre os deportistas das categorías inferiores.
As cinco modalidades de Ximnasia en Trampolín poderanse observar no Pavillón con trampolín individual, dobre minitramp, tumbling, trampolín sincronizado e minitrampolín. E os catro mellores en cada aparato clasificaranse para o Mundial de Trampolín que se desenvolverá en novembro en Daytona Beach de Florida (Estados Unidos).
Algúns dos ximnastas que participarán neste campionato acudirán á Olimpíada de Brasil, segundo infomó durante a presentación da proba o vicepresidente da Federación Española, Fernando Nieto. O concelleiro de Deportes, Agustín Fernández, apuntou que Pontevedra "ten unha débeda pendente coa ximnasia" ao que Pablo Hinojar, adestrador principal do club Ximnasia Pontevedra e actual responsable do equipo nacional da modalidade de ximnasia acrobática, indicou que levan vinte anos esperando por unha sala na cidade dedicada á práctica da ximnasia. Hinojar afirmou que ao redor de cincuenta deportistas da bisbarra realizan a modalidade de trampolín con nomes como Adrián Soliño, catro veces campión español de tumbling.
A entrada ao Pavillón será libre durante os catro días, coa intención de fomentar este espectacular deporte.