O fútbol sala ábrese á cidade co torneo na rúa organizado polo Leis
Por Redacción
Preto de 400 xogadores, dende a categoría prebenxamín ata a cadete, cítanse dende este venres na primeira edición do Futsal Street organizado polo Leis Pontevedra.
O torneo de fútbol sala na rúa conta coa participación de 25 equipos, que ata última hora do sábado competirán por facerse co triunfo nas pista habilitada na Avenida Monteiro Ríos.
Esta actividade é unha das organizadas polo club lerezano durante o mes de xuño, que finalizará co Futsal Camp nas instalacións do colexio San Narciso entre os días 22 e 29.
Os clubs participantes no torneo na rúa son, ademais do propio Leis Pontevedra: ADFS Bueu, Cafyd, AJ Lérez, Meniños, San Narciso, Redondela, Coruxo, Ancoradouro e Vigo 2015.