Xuño, mes do futsal en Pontevedra
Por Redacción
O Leis Pontevedra prepara os últimos detalles para converter o mes de xuño nun auténtico mes do futsal na cidade.
A entidade lerezana prepara unha serie de actividades relacionadas co fútbol sala que se prolongarán ata final de mes.
O primeiro evento da lista son unhas charlas en 14 centros educativos sobre deporte e vida saudable cunha iniciación a esta disciplina. O 'Futsal School', como se lle bautizou, desenvolverase dende o 28 de maio ata o día 6 de xuño.
Un día despois o Pavillón Municipal dos Deportes acollerá a fase final da Copa de Terceira División e da primeira xuvenil, ata o domingo 8 de xuño.
Como complemento á competición a Federación Española cedeu a Copa do Mundo e Eurocopa de fútbol e tamén a Eurocopa de Fútbol Sala, que serán exhibidas durante estes dous días.
Os actos continuarán o 13 e 14 de xuño co primeiro torneo na rúa 'Futsal Street', que terá lugar na Avenida Monteiro Ríos coa participación de clubs e colexios de toda a provincia.
E xa para colofón, a directiva do Leis traballa na organización do 'Futsal Camp 2014', que pechará un intenso mes entre os días 22 e 29 de xuño con sede no Colexio San Narciso de Marín, cun programa no que figuran diversas actividades, excursións e visitas de futbolistas de primeiro nivel, segundo informou a entidade lerezana, dirixido a nenos entre os 9 e os 16 anos.