O Teucro despídese da súa afección cun derbi ante o Octavio en Copa Deputación
Por Redacción
O Pavillón Municipal dos Deportes de Pontevedra acollerá este xoves (20:30 horas) o último partido oficial como local da Sociedad Deportiva Teucro na presente tempada.
Farao cun derbi ante o Octavio vigués nunha das semifinais da Copa Deputación, cuxa final se xogará o domingo no Gatañal ante o Cangas, xa clasificado tras eliminar o Chapela.
O encontro, que contará con entrada de balde para o público, será unha boa ocasión para despedir os xogadores que non continuarán a próxima tempada no club azul.
Juan Barrios poderá aproveitar tamén para dar minutos aos que menos xogaron durante o curso.
AMIGABLES DO EQUIPO FEMININO ANTE COSTA RICA
Ademais do choque ante o Octavio, o Teucro presentou este mércores os dous partidos amigables que o seu equipo feminino vai xogar ante o combinado nacional de Costa Rica.
Será o colofón ao primeiro ano de vida das 'guerreiras azuis', primeiro este sábado 17 de maio (12:15 horas no Municipal) e despois o día 30 deste mes (20:30 horas no Multiúsos).
A entrada para ambos os dous encontros será libre.