As novas promesas do Ría de Aldán reinan en Verducido con 15 medallas
O Complexo Deportivo David Cal no encoro de Pontillón do Castro albergou desde este venres 19 de xullo ata o domingo día 21 o Campionato de España Sprint de Xóvenes Promesas para as categorías infantil e cadete.
Alí citáronse máis dun milleiro de padeeiros de 105 clubs diferentes, entre os que destacou o Club de Mar Ría de Aldán, que se consagrou como o equipo que máis preseas obtivo durante a competición, acumulando un total de 15 medallas: seis de ouro, seis de prata e tres de bronce. Seguíronlle na táboa o Piragüismo Aranjuez, con 13 medallas, e o RCN Port de Pollença, con sete.
Na clasificación xeral por equipos, o Piragüismo Aranjuez alzouse coa primeira posición, acumulando un total de 999 puntos. O Club de Mar Ría de Aldán quedou en segunda posición con 858 puntos, mentres que o Mercantil de Sevilla ocupou o terceiro lugar con 769 puntos.
Na categoría cadete feminina, o Mercantil de Sevilla coroouse como o gañador cun total de 262 puntos. En segunda posición quedou o Piragüismo Aranjuez, con 257 puntos, e o terceiro lugar foi para a Escola de Piragüismo Ciudad de Pontevedra, que acumulou 196 puntos. O Club de Mar Ría de Aldán dominou a categoría cadete masculina cun total de 367 puntos. O Piragüismo Aranjuez fíxose coa segunda praza con 261 puntos e o equipo sevillano, coa terceira, con 218 puntos.
Na clasificación infantil feminina, o equipo gañador foi o do Morrazo, que sumou 285 puntos. O Mercantil de Sevilla situouse en segunda posición con 235 puntos, seguido polo RCN Port de Pollença, que obtivo 184 puntos. O Piragüismo Aranjuez destacou como o equipo gañador en categoría infantil masculina cun total de 281 puntos. O segundo lugar foi para As Torres Romería Vikinga, que sumou 176 puntos, e o terceiro lugar foi para o CSD SantiagoTarrak, con 173 puntos.
A vicepresidenta da Deputación Luisa Sánchez fixo entrega das medallas e remarcou que a provincia de Pontevedra "é potencia neste deporte", subliñando que "temos máis licenzas de piragüismo que na segunda comunidade autónoma con máis deportistas desta modalidade".
Campionato de España Sprint de Xóvenes Promesas para as categorías infantil e cadete
Máis dun milleiro de padexeiros déronse cita desde o venres 19 de xullo ata o domingo día 21 no Complexo Deportivo David Cal no encoro de Pontillón do Castro para disputar o Campionato de España Sprint de Xóvenes Promesas para as categorías infantil e cadete
© Cristina Saiz
Relacionadas:
-
Máis de 1.000 deportistas en Verducido no Campionato de España Sprint de Xóvenes Promesas
Por Redacción |
-
Acabou a espera: Pablo Crespo estará en París 2024
Por Alejandro Espiño |
-
Teresa Portela e a conta atrás cara a París 2024: "Xa se senten eses nervios"
Por Diego Espiño |
-
Antía Jácome gaña o C-1 200 do Selectivo e fará dobrete nos Xogos Olímpicos de París
Por Diego Espiño |