Trompazo do Teucro (25-28) ante o pechacancelas Ereintza
Por Ramiro Espiño
Peor imposible. O Teucro realizou o peor partido en moito tempo, non só da actual tempada. Como confiado na debilidade do rival, e na pobreza dos seus resultados (unha sóla vitoria nos 18 partidos anteriores), aos de Javier Barrios custoulles entrar en calor, tanto que non o fixeron ata os últimos cinco minutos da primeira parte, nos que conseguiron unha curta renda, sustentada a medio camiño entre a inercia da súa superioridade e o cambio defensivo ordenado polo técnico local.
O Ereintza atopouse cun Teucro lento, que xogaba sen ritmo nin intensidade defensiva, e que en ataque se confiaba ao acerto lanzador de Carlos García e David García Pichel, tanto que foron os dous únicos en anotar para o equipo azul nos primeiros 22 minutos de partido (9 goles entre ambos).
Coma se o cambio de hora habitual, pasando a xogar na matinal do domingo, lles afectase, os teucristas tardaron en espertar, o mesmo que a afección, tamén menor en número a xornadas anteriores. Mentres o conxunto vasco aproveitouse para ir sumando goles, comezar a crer que era posible o milagre, e levar a iniciativa no marcador.
Iso si, en canto o Teucro apertaba un pouco todo cambiaba. E fíxoo a partir do minuto 25. Javier Barrios chama á orde aos seus e cambia a habitual defensa 6-0 a un 3-2-1. E ao Ereintza fundíronselle os fusibles. Comezaron a chegar achegas ofensivas doutros xogadores, como Alejandro Pombo. Foi suficiente para que, sen facer moito, os locais fósense ao descanso por diante.
Pero ao regreso de vestuarios volve a sesta local. Incomprensiblemente Javier Barrios volve ao 6-0 defensivo e o equipo bota por terra a vantaxe de 3 goles, conseguida tras dous roubos de balón consecutivos. E o Ereintza aprovéitao. Mentres a defensa non funciona, o ataque comete erros pouco habituais, o que obriga ao técnico a pedir tempo morto mediado o segundo período, cos vascos un arriba.
O Teucro recupera a defensa 3-2-1, que de novo se lle atraganta aos visitantes. Pero o festival de despropósitos continúa. Perdas absurdas que permiten contragolpes, mentres en ataque só García Pichel parecía capaz de facer gol, o que lle levaba a cometer case a mesma cantidade de erros que de acertos.
Con tantas facilidades ata un equipo limitado como o Ereintza tiña que sacar partido. E fíxoo. Con tres arriba (24-27) a falta de menos de cinco minutos, ao Teucro xa só lle quedaba a heroica. Non funcionou. O Teucro deu a sorpresa negativa da tempada, facendo bo neste partido o dito de que o que mal empeza, mal acaba.
A celebración dos vascos foi de época, coma se lles servise para evitar un descenso cantado. Era a súa segunda vitoria da tempada. Merecida. Tanto como merecida foi a derrota dun Teucro irrecoñecible.
S.D. TEUCRO (25): Dani Cadilla; Marcos Dorado (1), David García Pichel (11, 2 de penalti), Miguel Porto, Carlos García (5), Borja Pedreira (4), Miguel Sío -siete inicial-, Héctor Gil (p.s.); Carlos Pombo, Alejandro Pombo (3), Tomás Moreira (1), Víctor Rodríguez Costas, Iván Fernández, César Armán.
EREINTZA AGUAPLAST (28): Román Dupuy; Daniel Solano (3), Iker Garmendia (1), Oier Aguado (1), Alexis Gimeno (6, 2 de penalti), Mikel Iraeta (7, 4 de penalti), Aritz Otegui (1) -siete inicial-, Joseba Zabala (p.s.), Jon Imanol Vázquez (3), Ioritz Huete (1), Aritz Tolaretxipi (1), Alain Saseta (4), Eduardo Ágreda.
Árbitros: Sebastián Fernández Molina e Alberto Murillo Castro (Andalucía). Excluíron por dous minutos a Alejandro Pombo, Víctor Rodríguez Costas, Carlos García e Borja Pedreira polo Teucro e a Daniel Solano (2) e Iker Garmendia polo conxunto vasco.
Marcador (cada cinco minutos): 1-2, 3-3, 4-5, 8-8, 11-12, 16-14 (descanso), 19-16, 20-19, 21-22, 23-24, 24-26 e 25-28 (final).
Incidencias: Pavillón Municipal dos Deportes (Pontevedra). Uns 300 espectadores.