Un Teucro en cadro polas baixas viaxa a Antequera
![Ramiro](/web/cache/scene/uploads/xornalistas/foto/a72/_S7QytKoutjK3UsovKMnMzytWsi62MjSxUqrKz891Lsov0DEyAC_/_Il61oA_/6352bc9a23-20140207-patxot-ramiro-020.jpg)
Por Ramiro Espiño
Acumúlanse as baixas nun dos momentos claves da tempada. Ás xa coñecidas ausencias de Juan Bar e David Chapela, sumáronse as de César Armán e Víctor Rodríguez, que tampouco puideron viaxar cos seus compañeiros a terras andaluzas, onde han de enfrontarse (sábado, 18:30 horas) ao Meridiano Antequera, no pavillón municipal Fernando Argüelles, con arbitraxe dos colexiados Pedro José Amigo Plaza e Javier Espadas García de la Galana (Castilla La Mancha).
Se importantes eran as ausencias de porteiro e central, os problemas físicos que afectan a César Armán e Víctor Rodríguez minguan considerablemente o potencial do equipo teucrista na súa primeira liña, en especial a baixa de Armán, que tras a lesión de Chapela (quen por certo será operado o próximo martes da súa lesión de ombro) entrara nas rotacións do equipo, para dar descanso a David García Pichel, que agora se queda como único central dispoñible.
O Meridiano Antequera será ademais un complicado rival. Aínda que no partido da primeira volta disputado no municipal pontevedrés o Teucro se impuxera por un amplo 34-25, ese marcador pode levar engano, xa que o choque non estivo resolto ata a recta final.
Os andaluces estanse a mostrar como un rival moi complicado, especialmente na súa pista, na que tan só o Benidorm conseguiu derrotalos ata o momento. A importancia dos puntos é maior por canto Antequera avantaxa o equipo teucrista nun punto na clasificación, polo que os de Javier Barrios intentarán sobrepoñerse ao rival e ás baixas para non regresar de baleiro.