O harmonio centenario de Xeve recuperado con financiamento popular volve soar
Por Redacción
A igrexa parroquial de Santa María de Xeve acollería o próximo domingo 6 de novembro o concerto no que volverá soar o seu harmonio centenario, recuperado como resultado dunha campaña de financiamento popular.
O concerto será ás 19.00 horas e actuarán a pianista Lorena Varela (harmonio e piano), o cantante Isidro Betacourt e a violinista Ioana Pérez.
O mestre Fernando Ruibal, natural de Xeve e director musical do concerto, compuxo unha canción que se estreará para a ocasión, de título 'O piñeiro de Gondar', con letra da poesía do mesmo título de Conchi Núñez de Gatomorto.
Esta iniciativa foi financiada única e exclusivamente coas achegas das persoas interesadas en contribuír á recuperación do patrimonio de Xeve mediante donativos de 2 euros.
As labores de recuperación, que se fixeron en Cambre (A Coruña) por Luis Ares Esmorís, permitiron darlle unha nova vida a este instrumento musical, que ten máis de 120 anos e foi fabricado pola compañía parisina H. Christophe & Etienne.
A edición limitada de tarxetóns está case esgotada. As persoas interesadas aínda poden conseguilos chamando ao número de teléfono móbil 722 844 872. E para calquera outra información sobre o evento.
O programa do concerto terá dez pezas: 'O son do Ar', de Luar na Lubre, 'O carro', de Fuxan os ventos, 'Meu amor é mariñeiro', de Fuxan os ventos, 'Alborada da Lanzada', con música de Ernesto Campos, 'Romeiro ao lonxe (Scarborough Fair), de Luar na Lubre, 'Tu gitana', de Luar na Lubre, 'Na capela de Esperante, con música de Ernesto Campos, 'Ao-Tea-Roa', de Luar na Lubre, 'O piñeiro de Gondar', poema de Conchi Núñez, musicado por Fernando Ruibal e 'Os pinos', o himno galego.