Castrolandín será unha das sedes do Festival de Narración Oral Atlántica
Por Redacción
O castro de Castrolandín en Cuntis será sede da IX edición do Festival Internacional de Narración Oral Atlántica que este verán percorrerá 27 concellos galegos e que, aproveitando a volta á normalidade, opta por un formato ao aire libre e en escenarios con interese patrimonial.
O alcalde de Cuntis, Manuel Campos, xunto coa tenente de alcalde Conchi Campos e o concelleiro José Treviño mantiveron esta semana unha reunión cos membros da Fundación Terratermarum Castrolandín, á que acudiu tamén a directora do Festival Atlántica, Soledad Felloza. O Concello de Cuntis asinará un convenio con ambas entidades para facilitar a celebración do Festival no castro durante a primeira semana de xullo, nunha data aínda por concretar.
Manuel Campos destacou a importancia que ten para Cuntis vencellar actividades culturais coa promoción do patrimonio arqueolóxico do municipio e confía tamén no potencial turístico deste Festival como revulsivo para dar a coñecer as singularidades do municipio termal. "A narración oral forma parte da nosa identidade, das nosas tradicións, de aí a nosa implicación co proxecto", apunta.
O Festival levará 82 actividades ata 27 municipios galegos da man de 35 artistas de distintas nacionalidades que narrarán historias como "O sangue das pantasmas", de Manolo Gago ou "O retorno dos homes mariños", de Xurxo Souto. I é que unha das funcións deste evento é reivindicar a arte do contador de historias artellado nunha secuencia de sedes que conecta a Galicia rural coa das cidades, a través dun traballo en rede realizado coa implicación de concellos pequenos, medianos e grandes.