Concerto en Pontevedra das cantareiras 'Ialma', as "tanxubelgas" fillas da emigración
Por Oskar Viéitez
O grupo internacional de cantareiras belga Ialma actuará no Pazo Provincial para homenaxear a Rosalía de Castro no acto organizado pola Deputación de Pontevedra, será este mércores 23 de febreiro.
O grupo Ialma está composto por catro cantareiras fillas da emigración nacidas en Bruxelas.
Son catro mulleres loitadoras e concienciadas coa esencia máis tradicional, a contemporaneidade e a fusión das culturas que conviven con naturalidade e harmonía na cidade belga.
Os seus traballos, característicos por reflectir a súa propia historia e a de tantos emigrantes, que se repite no tempo, leva 20 anos percorrendo o mundo polos mellores festivais de música folk, de raíz, de fusión e divulgación.
Dende Ortigueira ata Castrelos, dende Marrocos ata Taiwan ou Canadá e incluso ate Eurovisión de mans dunha das compoñentes, Verónica Codesal. Grandes artistas como Guadi Galego, Dulce Pontes, Carlos Núñez, Mercedes Peón, Kepa Junquera, Quique Peón, Xurxo Fernandes, Eliseo Parra, Kiko Veneno, A Filleta, Manou Gallo, Arbon Urban Trad apostaron pola súa colaboración.
Con sete exitosos discos no mercado, Ialma volta a Galicia con cancións do exilio, con alento cheo de diversidade en forma de cantareiras.
Música de raíz galega cunha ollada futurista, adaptada aos novos tempos tanto en temática como en ritmo. Temas profundos e sentimentais conviven con outros máis festivos e bailables para homenaxear a Rosalía de Castro.
"Para nós é sempre un agasallo, alegría e vida conectar coa nosa xente", aseguran Ialma.