O Memorial Filgueira Valverde trae ao presente o legado do arquitecto Alejandro de la Sota
Por Redacción
Alejandro de la Sota será homenaxeado como "un dos grandes arquitectos galegos e españois do seu tempo e figura de culto para os seus colegas de profesión" en Pontevedra, a súa cidade natal. Será co gallo do centenario do seu nacemento en 2013 e o primeiro pasó darao a undécima edición do Memorial Filgueira Valverde.
O director do Museo de Pontevedra e coordinador da iniciativa, Carlos Valle, expricou que o Memorial está integrado por tres conferencias a celebrar do 6 ao 8 de novembro no Sexto Edificio do Museo e rememorarán as súas principais achegas á cidade da man de expertos e compañeiros de profesión.
O obxectivo do Memoria é traer ao presente a significación do labor profesional de Alejandro de la Sota tanto para a arquitectura galega como para a española da segunda metade do século XX. "Será o anticipo das moitas actividades, que sen dúbida, se lle consagrarán en 2013, ano no que se conmemorará o centenario do seu nacemento", subliña Valle nunha información recollida pola Universidade de Vigo.
Carlos Valle relata que de la Sota se converte na figura homenaxeada desta edición polos lazos de amizade que mantiña co propio Xosé Filgueira Valverde, "nacido só sete anos antes ca el e pertencente a súa mesma xeración".
Por outra banda, o arquitecto deixou en Pontevedra e os seus arredores algunhas das súas creacións máis significativas, como o remodelado Pavillón de Deportes ou a Casa Domínguez no Concello de Poio, "ademais de ser fillo de Daniel de la Sota, mítico presidente da Deputación de Pontevedra nos anos 20 e personalidade esencial para a conformación de Pontevedra como urbe e provincia ao liderar iniciativas tan importantes como a creación do museo ou da caixa de aforros provincial", aclara Valle.
Tras once edicións, Carlos Valle fai un balance "máis que positivo" dos memoriais, "se non fose así non se manterían durante tantos anos", reflexiona. Tanto a vicerreitora do campus de Pontevedra, Antonia Blanco, como o director do Museo sinalan a expectación que o ciclo de conferencias organizado ao abeiro da Cátedra Filgueira Valverde crea entre a cidadanía pois "dende setembro estamos recibindo chamadas no museo preguntando se se celebra ou non o Memorial deste ano".