50.000 exemplares antiguos e de ocasión para colmar a "fame de libros de feira" dos pontevedreses
Por Natalia Puga
50.000 libros vellos, usados, de ocasión e de saldo poderán adquirirse a partir deste sábado día 1 e ata o 16 de xuño no paseo de Antonio Odriozola. Son o stock que traen a Pontevedra dez librarías de toda España con motivo da XVII Feira do Libro Antigo e de Ocasión.
A feira é a segunda consecutiva que se celebra en Pontevedra tras varios anos de suspensión e os seus organizadores, a Federación de Libreiros de Galicia e o Concello de Pontevedra, confían en que teña unha "acollida excepcional", na liña da que obtivo a Feira do Libro celebrada entre os días 22 e 26 de maio.
A voceira dos libreiros, Mar Vázquez, destacou que entre as librarías que exporán os seus exemplares hai dúas pontevedresas, Cao e Solpor, e o resto son doutros puntos de España como Alicante, Valencia ou Madrid.
No stock traerán "auténticas xoias" que o público poderá adquirir entrando nos propios postos en horario de mañá (de 11.00 a 14.00) e tarde (de 17.30 a 21.30 horas), no que a concelleira de Cultura, Anxos Riveiro, cualifica como "un acercamento ao libro doutra maneira".
O coordinador da Federación de Libreiros, Antonio Fernández Maira, fixo referencia ao éxito da anterior edición para asegurar que en Pontevedra "había fame de libros de feira" e explicou que se poden adquirir libros dende un e dous euros "sen límite por arriba", pois "non é raro que atopen libros de máis de 30.000 euros".
A feira está destinada ao público en xeral, pero, sobre todo, a un máis especializado e mesmo a coleccionistas, que poderán encontrar dende libros do ano 740 a primeiras edicións dos séculos XIX e XX, pero, fundamentalmente, libros dos séculos XVI e XVII.