A familia do pintor Carlos Bóveda doa tres cadros ao Museo de Marín
Por Oskar Viéitez
A familia do pintor Carlos Bóveda fixo doazón dunha serie de obras que pasarán a formar parte da pinacoteca do Museo Manuel Torres, e que a alcaldesa María Ramallo recibiu de mans da viuva do artista, Sara Paz.
O pasado 6 de novembro o Museo de Marín acolleu unha exposición deste recoñecido pintor galego.
Nacido en 1933, Carlos Bóveda formouse traballando desde os 15 anos como decorador na Cerámica Celta de Pontecesures, por onde pasaron artistas como Asorey, Maside ou Castelao.
No ano 1962, emigrou a Buenos Aires, onde pasou 40 anos ata o seu emotivo regreso a Galicia, no ano 2002, coa exposición Reencontro, en Santiago de Compostela. En Arxentina estableceu contacto con outros artistas emigados como Laxeiro, Castro Couso, Geno Díaz e Solla, ademais de realizar múltiples exposicións individuais e colectivas e ser membro da comisión de cultura do Centro Lucense de Buenos Aires.
Como autodidacta que foi, Carlos Bóveda destacou por un eterno afán de superación que ía en paralelo a unha sobria tranquilidade como pintor, patente na súa pintura, cálida e inimiga das estridencias, onde a cor xoga un papel fundamental.
Galicia, omnipresente na súa pintura, foi a súa musa aos dous lados do Atlántico e foi tamén cuestión primordial tanto na súa obra como no seu pensamento. Bóveda contou a historia da súa terra desde un cariñoso humanismo que daba voz a paisanos e paisaxes, os grandes protagonistas dos seus cadros. Estes son costumistas, cheos de pescadoras, labregos, sementados e mariñeiros, e gozan dun realismo expresivo que foxe das normas pictóricas situándose á marxe dos movementos artísticos propios da época.