Os 'cranios privilexiados' de Mofa e Befa repasan o mundo da filosofía
Por Diego Torrado & Anxo Lourido
Mofa e Befa, o veterano dúo cómico galego formado por Evaristo Calvo e Víctor Mosqueira, ofrecía na noite deste xoves no auditorio de Afundación o seu último espectáculo 'Cranios privilexiados... ou Crítica dá Razón Perralleira', unha obra baseada en textos orixinais de Pepe Sendón e Carlos Santiago, que se encarga tamén da dirección da montaxe.
Os espectadores, que cubriron máis da metade das butacas da sala, divertíronse coa versión do mundo da filosofía que ofreceron Mofa e Befa realizando as grandes preguntas sobre a humanidade desde un punto de vista galego, con numerosas referencias a Sócrates, a Descartes, ao mito da caverna ou aos marcos que limitan as leiras a través da visión do filósofo Polemón, creador dunha obra universal, a Crítica da Razón Perralleira.
Ao longo de case dúas horas, os dous intérpretes recrearon a diferentes personaxes da historia da filosofía e analizaron cuestións sobre o pensamento nas que non faltaron chiscadelas a Cataluña, a Podemos, a José María Aznar ou a Mariano Rajoy.