O campus de Pontevedra dedica un ciclo de cine a cinco directoras galas
Por Redacción
Cinco cineastas francesas de referencia e cinco das súas películas máis destacadas centran o novo ciclo de cinema promovido pola Vicerrectoría do campus de Pontevedra, "Miradas femininas no cinema francés contemporáneo", que este venres comeza na Casa das Campás.
Organizado coa colaboración do Instituto Francés do Cinema, este ciclo propón un percorrido pola obra de varias das cineastas máis recoñecidas do país veciño, desde representantes da Nouvelle Vague como Agnès Varda ou realizadoras que iniciaron a súa traxectoria na década de 1970 como Chantal Akerman, ata representantes do cinema máis contemporáneo como Claire Denis, Mélanie Laurent e Fanny Ardant. Un percorrido no que as proxeccións se verán complementadas cun coloquio coa programadora do ciclo, a experta en cinema francés Bárbara Santos.
A programación de "Miradas femininas no cinema contemporáneo" foi presentada este mércores en rolda de prensa polo vicerreitor do campus, Juan Manuel Corbacho, e a responsable da área de Extensión Cultural, que incidiron en que esta é unha actividade gratuíta e aberta a toda a cidadanía coa que a Universidade de Vigo busca achegar á cidade a súa programación cultural, así como dar continuidade a outros ciclos de proxeccións desenvolvidos con moito éxito na Casa das Campás.
Tamén participou nesta presentación a directora da Unidade de Igualdade da Universidade, Anabel González Penín, quen apuntou "que o cinema é outro campo no que as mulleres non estamos suficientemente representadas", como tamén destacou a concelleira de Igualdade, Carmen Fouces, nunha presentación na que puxo de relevo "que este tipo de actividades son de capital importancia para visibilizar o gran traballo que fan as mulleres e que ten moitos problemas para transcender".
A programación abrirase este venres 6 coa proxección de La Folie Almayer (2011), de Chantal Akerman, e sete días despois, poderase ver Jacquot de Nantes (1991), de Agnès Varda, unha película a medio camiño entre o documental e a ficción que esta cineasta centrou na figura do seu marido, o tamén realizador Jacques Demy.
Xa o 20 de maio terá lugar a proxección de J´ai pas sommeil (1994), que Claire Denis inspirou na historia real, do asasino coñecido como o "monstro de Montmartre". Sete días despois proxectarase Respire (2915), de Mélanie Laurent, filme que narra a relación entre dúas alumnas de secundaria e, por último, o ciclo pecharase o 3 de xuño con Cendres et sang (2009), a primeira película como directora dunha das actrices francesas máis recoñecidas, Fanny Ardant
Todas as proxeccións serán ás sete e media da tarde.