Luis Iglesia e Xabier Deive despiden o 11 de abril a súa "Sede de mal" cunha última función en Pontevedra
Por Redacción
Luis Iglesia e Xabier Deive regresan a Pontevedra coa obra de teatro Sede de mal. Tras máis dun ano actuando por toda Galicia con esta función, ambos os dous actores inician a súa xira de despedida. E unha destas últimas paradas será o auditorio da sede de Afundación en Pontevedra. Será o próximo 11 de abril, a partir das 20.30 horas.
A obra, que xa foi representada no Teatro Principal e na Sociedade Cultural e Deportiva de Mourente, está orientada a un público adulto e foi definida como "unha comedia a 12 cordas sobre o lado escuro da vida".
Trátase dun paradigma de humor e música en directo con blues e rock que non deixa monicreque con cabeza na orde establecida coas súas voces, cancións e diálogos. Todo iso aderezado cos seus traballados textos e unha moi interesante proposta musical en directo, logran enganchar o público con reflexións e preguntas sobre a vida mesma.
Para máis interese, esta produción de Boneca Lareca conta cun guion escrito por Carlos Santiago e os propios protagonistas, Luis Iglesia e Xabier Deive.
Humor, teatro, música en directo con blues e rock and roll "á galega" con dous dos personaxes máis importantes da escena galega dos últimos anos que ofrecen ao seu público unha comedia da vida, unhas ensinanzas evanxélicas, un "leit motiv para non ser un pimpín. Ou queredes ser pimpíns? ", din con toda a ironía posible os dous actores, que neste espectáculo dan renda solta ao seu lado máis salvaxe e divertido.
As entradas para este espectáculo están á venda a través de www.ataquilla.com e no teléfono 902 504 500.