Primeiro disco de Skirl, os herdeiros pontevedreses do grunge de Seattle
Por Redacción
Catro mozos pontevedreses uníronse baixo o nome de Skirl para gravar o seu primeiro traballo discográfico que poderá adquirirse a partir deste venres 13 en distintos puntos da cidade e a través da páxina desta banda.
Skirl caracterízase polas influencias que o grunge dos 90 deixou nos seus membros e que plasmaron nun disco gravado durante o mes de outubro en Vigo. Editaron 200 unidades do cd físico que poderán comprar por 7 euros aínda que as cancións tamén estarán á venda a través de plataformas dixitais.
Os membros da banda presentaron este primeiro álbum no Concello de Pontevedra, en compañía do concelleiro de Xuventude, Demetrio Gómez e anunciaron que o concerto para mostrar os dez temas que contén este traballo será o 4 de xullo na sala Karma e xa teñen varios "bolos" previstos ao longo do verán, entre outros lugares, en Portonovo e en Cangas.