Carlos Blanco e Luis Davila compiten coa final da Champions
Por Redacción
O humorista Carlos Blanco e o debuxante Luis Davila enfróntanse na noite deste sábado á final da Champions League entre o Real Madrid e o Atlético de Madrid. Ás 20.00 e ás 22.00 horas, os dous artistas sairán ao escenario do Teatro Principal coincidindo co desenvolvemento do partido para presentar o seu espectáculo 'Menú do Día', unha obra para a que xa venderon de xeito anticipado 800 entradas.
A proposta desta parella humorística ofrece momentos moi divertidos de "Dora, a desbrosadora", un dos personaxes máis populares das viñetas de Davila. O espectáculo dura unha hora e media. E de non se esgotar na venda anticipada, as últimas entradas poderán adquirirse ao prezo de 12 e 10 euros no despacho do Teatro Principal.
A próxima semana, o xoves 29, o Principal acollerá 'A charca inútil' de Teatro do Atlántico, unha obra dirixida por Xulio Lago con Marcos Viéitez, María Barcala e Gonzalo Uriarte na repartición. Nesta montaxe trátase a historia dun profesor que abandona o ensino debido á agresión dun alumno.
Dentro do ciclo Pontevedra Escénica no que se engloban estas obras inclúense tamén o espectáculo de danza de Entremáns, 'Blondy's Coffee', o 5 de xuño no Principal e a obra 'De amor y lujuria' o 19 do mesmo mes no Pazo da Cultura coa actuación de María José Goyanes e Emilio Gutiérrez Cava. As entradas xa se encontran á venda en servinova.