A compañía de teatro cuntiense Código Morsa estréase coa obra 'Supergalácticos'
Por Redacción
"Había unha vez un planeta nunha afastada galaxia no que vivían uns seres similares a nós, pero que posuían habilidades extraordinarias". Así empeza a descrición de Supergalácticos, primeira montaxe teatral da compañía cuntiense Código Morsa.
Trátase dunha obra de teatro infantil na que se homenaxea ao mundo dos superheroes dirixida polo lucense Fran Rei e protagonizado por Saleta Fernández e Alberto Torres, veciños de Cuntis.
Sobre o escenario os actores darán vida a unha parella de superheroes que deberán sobrevivir ás situacións máis ridículas e perigosas nunha montaxe que propicia a participación activa dos espectadores.
O Auditorio Patelas de Cuntis acollerá este domingo 18 de maio, ás 19:00 da tarde, a primeira función, destro da programación do Día das Letras Galegas organizada pola Asociación Río Gallo.