O Russian Classical Ballet presenta a peza clásica 'A bela durminte' de Tchaikovski
Por Redacción
O Russian Classical Ballet ofrecerá no Centro Cultural da Fundación Novacaixagalicia en Pontevedra unha representación de A bela durminte de Pyotr Ilyich Tchaikovsky o xoves 29 ás 20.30 horas.
Para abordar esta obra clásica, a compañía rusa coidou a produción incluíndo unha dura selección dos bailarins, procedentes todos eles dalgúns dos centros máis recoñecidos do mundo.
O Russian Classical Ballet foi fundado en Moscú en 2004 por Hassan Usmanov, director artístico e bailarín principal da compañía. O grupo está formado por artistas xa consagrados e por novos bailarins graduados na Academia de Ballet Bolshoi, a Academia Vaganova e outras escolas de danza de gran fama a nivel internacional. O Russian Classical Ballet realizou con éxito xiras tanto por Rusia coma polo estranxeiro en países como Austria, Alemaña, Suíza, Grecia, Ucraína, Xapón ou China.
A bela durminte, de Tchaikovski, é a historia da princesa Aurora, condenada a morrer pola malvada fada Carabosse. Vendo a gravidade do feitizo, a fada das Lilas suavizou a maldición evitando que a princesa morrese, pero facéndoa quedar sumida nun profundo sono ata que fose espertada por un bico de amor.
A bela durminte é un ballet nun prólogo e tres actos. Coa coreografía de Marius Petipa, libreto de Ivan A. Vsevolojsky e do mesmo Petipa.
Relacionadas:
-
Oito promesas da danza pontevedresa aprenderán este verán dos mellores bailaríns do mundo
Por Redacción |
-
'A bela durminte" do Russian Classical Ballet marabilla o público pontevedrés
Por Alejandro Espiño & Diego Torrado |
-
O Usmanov Classical Russian Ballet pon en escena 'A Bela Durminte' en Pontevedra
Por Oskar Viéitez & Mónica Patxot |