'Fauna esencial', fotografías de gran formato para viaxar desde Cuntis ata a vida silvestre
Por Redacción
A Casa da Cultura Roberto Blanco Torres de Cuntis acolle entre este mércores 19 de xuño e o 16 de xullo a exposición fotográfica 'Fauna esencial', un percorrido pola beleza e a fraxilidade das especies máis representativas da nosa contorna natural.
O acto de inauguración está previsto para as 11.00 horas deste mércores 19 coa presenza do alcalde de Cuntis, Manuel Campos; a directora da oficina ABANCA de Cuntis, María José Martínez; a coordinadora adxunta da Área de Cultura de Afundación, Paloma Vela; e a coordinadora da Área de Cultura de Afundación, Marité Cores.
Esta mostra é froito dunha colaboración entre o Concello, ABANCA e Afundación e será de entrada libre e gratuíta. Poderase visitar ata o 22 de xuño de 16.00 a 21.00 horas e a partir do día 24 de 9.00 a 14.00 horas.
Está conformada por 28 fotografías de gran formato realizadas polo naturalista Ezequiel Martínez, fotógrafo especializado en retrato de natureza que colabora con numerosas publicacións especializadas.
As imaxes están acompañadas de textos explicativos coas características biolóxicas, hábitats, costumes, alimentación, distribución xeográfica ou os perigos aos que se enfrontan para a súa supervivencia.
Inclúe grandes retratos con primeiros planos dalgunhas das especies máis significativas da Península Ibérica coma o oso pardo, a cegoña, o voitre leonado, o gamo, o cervo, a curuxa ou a aguia imperial, ofrecendo unha enriquecedora viaxe a través da diversidade da vida silvestre.