Trasládanse ao Auditorio as actividades da xornada de clausura de 'Vilagarcía, Cidade de libro'
Por Redacción
A cuarta edición do 'Vilagarcía, Cidade de Libro' clausúrase este domingo cunha xornada integramente dedicada ás escritoras e que, debido á previsión de chuvias, trasladará todas as súas actividades ao interior do Auditorio.
Co título de "A Biblioteca das mulleres extraordinarias", o evento contará coa presenza de firmas nacionais, como Nativel Preciado, e outras que repiten como Ángela Banzas, que regresa a Vilagarcía para presentar "La sombra de la rosa". Paula Carballeira, Amara Castro o Montse Fajardo son outras das autoras que estarán mañá na mostra vilagarciá.
A axenda do día arranca ás 11.30 horas coa presentación de "La sombra de la rosa" de Ángela Banzas. Debido ás condicións meteorolóxicas, o acto non poderá celebrarse en Cortegada, como estaba previsto. Trasladarase aos salóns do Gato Negro, outro dos escenarios que, xunto á illa carrilexa, ambientan a última novela da escritora galega. O cambio permitirá que máis xente poida asistir á presentación. A entrada é libre.
Ao mesmo tempo, nos espazos habilitados no Auditorio abrirán as casetas de venta e exposición de libros e comezará o primeiro espectáculo infantil do día, o contacontos "Elas Tres", interpretado por Paula Carballeira e que está dirixido a nenos de catro anos en diante.
Tamén no 'Recuncho dos Contos' do Auditorio pero ás 18.00 horas desenvolverase o obradoiro "Superheroínas, manual de instrucións". A actividade, dirixida ao público familiar, ten como obxectivo descubrir ás heroínas da vida cotiá, as que nos acompañan no día a día, e non saen nos cómics de Marvel.
O espazo de presentacións acollerá ás 18.00 horas a presentación do libro da viguesa Amara Castro Cid "Aquello que guardamos", acto que presentará Andreina Villanueva Nunes e no que intervirá a autora. A escritora tamén asinará libros na caseta do Espazo Lector Nobel Arousa.
Unha hora máis tarde dará comezo no escenario principal "Indóciles", un espectáculo multidisciplinar que achega ao público a obra de Luísa Villalta, a autora homenaxeada no Día das Letras Galegas. Será da man da narradora oral Vero Rilo, a recitadora Nuria Vil e a música Mónica de Nut.
A partir das 19.00 horas comezarán as sesións de firmas de Nativel Preciado, Ángela Banzas e Monste Fajardo, as mesmas que participarán na 'Conversa ao Solpor' prevista para as 20.30 horas e que moderará a xornalista Susana Pedreira.
A BANDA APRAZA O CONCERTO
A previsión de chuvia para a xornada deste domingo tamén obriga a aprazar o concerto que a Banda de Música de Vilagarcía tiña previsto ofrecer no Parque da Coca. A actuación organizada pola Concellería de Cultura no marco do ciclo "A Banda na Rúa" reprogramarase en función dos compromisos da formación. A data anunciarase tan pronto como estea fixada.
Relacionadas:
-
Éxito do Cidade de Libro de Vilagarcía coa participación de 8.000 persoas
Por Redacción |
-
As viaxes no tempo, no espazo e na memoria fan escala en Vilagarcía, cidade de libro
Por Redacción |
-
A segunda xornada do Vilagarcía, Cidade de Libro, chega cargada de misterio
Por Redacción |
-
Lúa Mosqueta, Ismael Ramos e Afra Torrado intervirán na xornada inaugural de Vilagarcía, Cidade do Libro
Por Oskar Viéitez |