Pontevedra súmase á celebración do Día de Rosalía cun recital poético no Teatro Principal
Por Redacción
177 anos cumpríronse este 24 de febreiro do nacemento de Rosalía de Castro. Unha efeméride que se celebrou en toda Galicia con numerosos actos institucionais e culturais. Baixo a denominación Día de Rosalía, entidades culturais, políticas e sociais reuníronse para recordar a figura da poetisa galega máis internacional.
Pontevedra tamén quixo celebrar a súa propia homenaxe. Foi a través dun recital poético, actividade enmarcada dentro do proxecto A memoria das mulleres. Tivo lugar no Teatro Principal e nel participaron Marta Dacosta, Lucía Novas e Olalla Cociña.
O acto, conducido pola concelleira da área de Muller e Benestar Social, Carmen Fouces, completouse coa actuación musical do grupo Adonairare.