1.300 escolares participarán no Correlingua pontevedrés á voz de "dende aquí até acolá, Galego xa!"
Por Mónica Patxot & Anxo Lourido
O luns 27 de maio está prevista a 24ª edición do Correlingua polas rúas de Pontevedra "coas risas e palabras das nenas e nenos para celebrar que estamos no mes da lingua", sinalaba na presentación da carreira escolar o concelleiro de Cultura, Demetrio Gómez, este martes 14 no Concello de Pontevedra.
Está prevista a participación de 1.300 escolares, desde os tres anos ata o bacharelato, procedentes de 19 centros da comarca nunha edición en que se sumaron tamén estudantes de espazos educativos de Barbanza, Rianxo ou Ribeira, segundo expoñía Xacobe Rodríguez Rivas, representante da CIG-Ensino. Nesta ocasión o lema será "Dende aquí até acolá, Galemos xa!".
Para esta singular carreira establécense dous percorridos, un para escolares de Infantil e un segundo destinado a estudantes de Primaria e Secundaria.
A marcha pola cidade concluirá, como é habitual, na Alameda de Pontevedra cun acto que será presentado pola actriz e humorista Isabel Risco e a actuación musical correrá a cargo de A Gramola Gominola, agrupación gañadora do concurso do Cantalingua desta edición na que participaron máis dun cento de grupos profesionais e afeccionados.
A festa finalizará coa tradicional solta de globos xigantes biodegradables "para que non haxa problemas co medio ambiente", sinalaba Xacobe Rodríguez, lembrando que estes elementos son un símbolo do galego que continúa avanzando polo país e voando cara ao seguinte Correlingua, que será o do 25 aniversario.
"Falamos da festa e esa festa é o final de todas as actividades porque Correlingua dura todo o ano escolar e implica a escritores e escritoras, artistas, músicos...", afirmaban Rodríguez, quen lembra que a intención é "reivindiar de maneira lúdica que os nenos e as nenas falen en galego, que a escola sexa un axente galeguizador".
Durante este curso desenvolveron os obradoiros de Desatalingua coa elaboración do manifesto que será lido en cada unha das marchas do Correlingua nas distintas vilas en que está a prevista a actividade.
Tamén se elaboraba o vídeo para publicar en redes do 'Regueifando', unha actividade na que participan os centros para fomentar o uso do galego de maneira colaborativa.
Xacobe Rodríguez amosaba a súa preocupación porque a última enquisa sobre utilización da lingua os datos amosaban que "xa hai máis nenos que falan castelán que galego".
Este ano está prevista a participación de 20.000 escolares en Galicia en todas as carreiras programadas no Correlingua.
Relacionadas:
-
Coa celebración do Correlingua quedan afectados os horarios de carga e descarga do luns
Por Oskar Viéitez |
-
A Pedreira celebrará dúas xornadas de Festa da Lingua para sementar futuro
Por Mónica Patxot & Anxo Lourido |
-
As letras galegas florecen en cada recuncho da Boa Vila este mes de maio
Por Oskar Viéitez |
-
Correlingua a ritmo de punk para reivindicar o uso do galego
Por Mónica Patxot & Anxo Lourido |