Poesía, baile, música, teatro e contacontos na programación de maio de 'Sanxenxo fala'
Por Redacción
Sanxenxo adica o mes de maio ás letras, dentro do programa Sanxenxo Fala, cunha ampla axenda cultural onde a poesía, o baile, a música, o teatro e os contacontos convírtense no epicentro da actividade.
O Centro Cultural Deportivo de Sanxenxo abre o programa este mércores coa exposición de maios que, ante a previsión de choiva, terá lugar na sede deportiva.
O sábado 4 terá lugar o II Encontro Manualidades na Rúa, amenizado por Os Gatiños de Portonovo, de 17 a 21 horas, na Praza do Mercado que en caso de choiva trasladarase ao Usos Múltiples de Portonovo. O venres, 10 de maio, a compañía Oviravai, levará "O Violín de Luisa" ao Auditorio Emilia Pardo Bazán. A entrada será de balde ata completar aforo.
O sábado 11 e o domingo 12 celebrarase a Lanzada de Maio, na Ermita da Lanzada con dúas xornadas nas que se porá en valor o rito das nove ondas, haberá un mercado artesanal, teatro e música. A actividade organizada polo Concello de Sanxenxo e a vomisión de festas da Lanzada arrancará cunha inauguración con pregoeira a cabalo e os Airiños, Os Gatiños e Lembranzas.
Ás 12 horas, abrirase a exposición de pintura 'As dúas portas da Lanzada' de Ana Cancela e a presentación do libro Roteiro do Padre Sarmiento de Marcelino Agís. Ás 12:30 horas terá lugar a loita de época con Ulf Klan. Xa a partir das 14 horas haberá xogos populares. Tatana Teatro, a partir das 17 horas, realizará un contacontos "O tesouro da Lanzada".
A partir das 17:30, realizarase unha visita guiada teatralizada "O que viu o cormorán" e ás 18:30 horas, haberá unha actuación musical. A partir das 22:30 realizarase unha representación do rito das nove ondas e ás 23 horas haberá Cantos de Taberna a cargo dos Firrás. A partir da medianoite, terá lugar a Noite Meiga con queimada.
O domingo, 12 de maio, realizarase unha homenaxe a Otilio, gaiteiro do Salnés con actuación de Airiños. Ás 12 horas haberá misa e procesión e ás 12:45 Cantos de taberna.
Este mesmo domingo celebrarase o VI Concurso de Música Tradicional Soalleira, organizado polo Concello de Sanxenxo e a Asociación Cultural Soalleira de Dorrón. As exhibicións están abertas ao público de 10:30 a 14 horas e de 16 a 20:30 horas.
O martes 14 terá lugar o espectáculo con Sole Felloza, "Contos coas Chaves do Tempo" sobre a autora homenaxeada co gallo das Letras Galegas, Luísa Villalta. Será ás 18:30 horas, na Biblioteca de Portonovo, ata completar aforo. O mércores 15, Baia Fernández, levará á Biblioteca de Sanxenxo, ás 19:30 horas, a actuación "Caracol, cara de col".
O venres 17 de maio, Día das Letras Galegas, celebrarase o acto homenaxe a Luísa Villata coa actuación do grupo de corda Dúo Silencio e Abiñadoira na Praza de Pascual Veiga a partir das 12 horas.
Pola súa banda, o sábado 18, na Curva de Portonovo, terá lugar o concerto Sons das Tabernas, ás 22 horas; e o domingo 19 celebrarase o festival das letras, +Q Cantigas, acto conmemorativo das Letras Galegas no CEIP O Cruceiro de Vilalonga. O luns, 20, a Biblioteca de Vilalonga acollerá Conto Aventuras, a partir das 18:30 horas.
O venres 24, Cris de Caldas leva á biblioteca de Portonovo a actividade "A conta delas", pensada para público adulto, a partir das 20 horas. Nesa mesma xornada, representarase "Pais, fillos e outras bicherías", espectáculo cómico-musical a cargo de Pepo Suevos, Manuel Manquiña e Dani Dopazo, a partir das 22 horas, no Auditorio Emilia Pardo Bazán.
Relacionadas:
-
'De Vilatriste a Vilalegre', do CDG chega a Meaño con motivo da celebración das Letras Galegas
Por Anxo Lourido |
-
A sexta edición do concurso de música tradicional Soalleira rexistra o seu récord de inscricións
Por Redacción |
-
Marín, Bueu e Caldas de Reis programan actividades polas Letras Galegas
Por Oskar Viéitez |
-
Luis López destaca o compromiso da Deputación coa lingua galega
Por Redacción |
-
As letras galegas florecen en cada recuncho da Boa Vila este mes de maio
Por Oskar Viéitez |
-
Sanxenxo adapta o PXOM á "nova realidade urbanística do territorio"
Por Oskar Viéitez |
-
Maio comeza con contacontos ilustrados no Museo nun mes dedicado a Luísa Villalta
Por Redacción |