As obras de 13 estudantes e graduados rememoran o fogar en Belas Artes
Por Redacción
O espazo O Abrigo da facultade de Belas Artes de Pontevedra reúne as obras de 13 estudantes e graduados e graduadas desta especialidade nunha exposición centrada nos sentimentos ligados á idea de fogar.
Coordinada pola agrupación Refugallo, integrada por estudantes de Belas Artes, nesta mostra conflúen "o sentimento de pertenza, a familia, o feito de habitar, a paisaxe ou a autopercepción persoal".
Refugallo fixo unha convocatoria aberta "a calquera obra que englobe o sentimento de fogar", destinada principalmente ao estudantado do centro e finalmente esta mostra reúne as creacións de trece estudantes e graduados e graduadas da facultade.
A exposición está no espazo que anteriormente ocupaba a cafetaría do centro e poderá visitarse ata este venres 8 de marzo.
'Fogar' é a segunda mostra que se promove neste cuadrimestre en O Abrigo e reúne as creacións de Marta Potter, Alba Pérez López, Ainoa Simons, Blanca Castro Ponce, Laura David, Claudia Ferreiro, Sara, Xancinho, Laura Karnero, Rita Seijas, Sam Almeida Manrique, Bruno Castro e Candela Eira Orro.
Os promotores explican que o principal peso desta mostra é pictórico e bastante figurativo, convivindo coa fotografía de arquivo e de paisaxe, aínda que tamén hai outras pezas cun carácter máis escultórico.