Investigan unha muller 'cazada' con roupa con etiquetas falsas valorada en 11.000 euros
Por Redacción
A Garda Civil denunciou unha veciña de Vilagarcía de Arousa por un delito contra a propiedade intelectual e interveu un total de 173 pezas de roupa de diversas marcas coa etiqueta falsificada, que alcanzarían un valor no mercado de máis de 11.000 euros.
As pezas estaban no interior dun vehículo ao que a patrulla fiscal da Garda Civil de Vilagarcía deu o alto nun control selectivo na estrada PO-306 en Vilanova, segundo informou a propia Garda Civil.
Os axentes comprobaron que a condutora, natural de Madrid aínda que residente en Vilagarcia, levaba unha gran cantidade de pezas de roupa aínda con etiqueta e carecía da correspondente factura de compra.
A condutora tampouco tiña a preceptiva autorización das marcas rexistradas afectadas para vender os seus artigos. Trátase de 173 pezas, na súa maior parte camisetas, sudaderas, pantalóns e outras pezas deportivas de marcas como Adidas, Nike, Puma ou Pepe Jeans, entre outras.
A Garda Civil non detivo á condutora, pero si lle informou de que pasaba a estar investigada como suposta autora dun delito contra a propiedade industrial e que se interviñan de forma preventiva todas as pezas. A roupa será entregada no Xulgado de Garda de Vilagarcia, que chamará á muller investigada para a súa declaración.
Relacionadas:
-
Incautan máis de 3.000 euros en roupa falsificada no mercadiño de Caldas
Por Redacción |
-
Requisan en Sanxenxo máis de 22.000 euros en prendas de roupa falsificada
Por Redacción |
-
A Garda Civil incauta unha partida de roupa falsificada en Sanxenxo
Por Redacción |
-
A Garda Civil incauta unha partida de roupa falsificada no mercadiño do Grove
Por Redacción |
-
Incautan 7.000 euros en roupa deportiva e bolsos na peaxe da AP-9 en Vilaboa
Por Redacción |
-
A Garda Civil incauta unha trintena de bolsos falsificados
Por Redacción |